جۇڭگونىڭ ايعا عارىشكەر شىعارۋ جاعىنداعى العاشقى قادامداعى جوباسى جاريالاندى
2023.07.13 15:34 كەلۋ قاينارى : حالىق تورابى
جۇڭگو عارىشكەرلى عارىش ينجەنەرياسى كەڭسەسىنىڭ ورىنباسار باس ينجەنەرى جاڭ حايلياننىڭ 7 - ايدىڭ 12 - كۇنى ۋحاندا وتكىزىلگەن جۇڭگو (حالىقارالىق) ساۋدالىق عارىش ىستەرى جوعارى دارەجەلىلەر ارا 9 - كەزەكتى تالقى مىنبەرىندە ايتۋىنشا، ەلىمىز 2030 - جىلدان بۇرىن ايعا عارىشكەر شىعارۋ ءۇشىن عىلىمي ىزدەنىس جاساۋدى جوسپارلادى، سودان سوڭ ايدا عىلىمي زەرتتەۋ جۇرگىزۋدىڭ سىناق بەكەتىن قۇرۋ جونىندە ىزدەنىس جاساپ، جۇيەلى، ءۇزىلىسسىز تۇردە ايدا بارلاۋ جۇرگىزۋدى جانە قاتىستى تەحنيكالىق سىناقتاردى ىسپاتتاۋدى ورىستەتەدى. كەزەكتە، ەلىمىزدىڭ ايعا عارىشكەر شىعارۋ ءىسىنىڭ العاشقى قادامداعى جوباسى مىناداي:
›››ەكى تاسىمال راكەتاسى ارقىلى اي بەتىنە قونۋ اسپابى مەن ادام الىپ ۇشاتىن الەم كەمەسىن جەكە - جەكە جەر مەن ايدىڭ اراسىنداعى اۋىسۋ وربيتاسىنا جەتكىزەدى، الەم كەمەسى مەن قونۋ اسپابى ايدى اينالاتىن وربيتادا توعىسىپ، ءوزارا تۇيىلىسەدى، عارىشكەر الەم كەمەسىنەن اي بەتىنە قونۋ اسپابىنا كىرەدى.
›››وسىدان سوڭ، اي بەتىنە قونۋ اسپابى اي بەتىنە قوناتىن مەجەلى وڭىرگە قونىپ، عارىشكەر ايعا قادام تاستاپ، عىلىمي زەرتتەۋ جانە ۇلگى الۋ قىزمەتىن ورىستەتەدى.
››› بەلگىلەنگەن مىندەتتەردى ورىنداپ بولعان سوڭ، عارىشكەر قونۋ اسپابىنا وتىرىپ، ايدى اينالاتىن وربيتاعا كوتەرىلىپ، وربيتادا الەم كەمەسىمەن توعىسادى ءارى ۇلگى زاتتاردى الىپ، الەم كەمەسىمەن جەرگە قايتىپ ورالادى.
بۇل مىندەتتى ورىنداۋ ءۇشىن، ەلىمىزدىڭ عىلىمي زەرتتەۋ قىزمەتكەرلەرى ۇزاق جورىق 10 - ءنومىرلى تاسىمال راكەتاسى، جاڭا ۇرپاق ادام الىپ ۇشاتىن الەم كەمەسى، اي بەتىنە قونۋ اسپابى، ايعا قونۋ كيىمى، ادام وتىرعىزىپ ايعا قوناتىن ماشينا قاتارلى اسپاپتاردى زەرتتەپ جاساۋدا.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
