2025 - جىلدىڭ سوڭىنا دەيىن، 5G تور جەلىسى شەكارا وڭىرلەردەگى اۋدان قالاشىعىنا، اۋىل - قالاشىقتارعا دەيىن تۇتاستىرىلادى

2024.01.12 13:07 كەلۋ قاينارى : حالىق تورابى

　　شينحۋا اگەنتتىگىنىڭ ءتىلشىسى جاڭ شينشين، ۋاڭ يۋەياڭ 1 - ايدىڭ 10 - كۇنى بەيجيڭنەن حابارلايدى. ونەركاسىپ جانە ينفورماتسيالاندىرۋ مينيسترلىگى قاتارلى 13 تاراۋ ”شەكارا وڭىرلەردەگى تور جەلىسى“ قۇرىلىسىن جەدەلدەتۋ جونىندەگى ۇقتىرۋدى 1 - ايدىڭ 10 - كۇنى جاريالاپ، شەكارا وڭىرلەردەگى قالا - اۋىلدارداعى تور جەلىسىنىڭ قۇرىلىسىن جەدەلدەتۋ جونىندەگى ءبىرقىدىرۋ شارالاردى ورتاعا قويدى، 2025 - جىلدىڭ سوڭىنا بارعاندا، شەكارا وڭىرلەردەگى اۋدان ورتالىقتارىندا، اۋىل - قالاشىقتار تۇرعان جەردە 5G تور جەلىسى جانە گيگابايتتىق وپتيكالىق جەلىنى تۇتاستىرۋ ىسكە اسىرىلادى، اكىمشىلىك اۋىل - قىستاقتارعا، 20 وتباسىدان جوعارى اۋىل - قىستاق جان سانى شوعىرلى ورنالاسقان وڭىرلەرگە، شەكارالىق باسقارۋ جانە ساۋدا قۇرىلىمدارىنا، ادام قونىستانعان تەڭىزدەگى ارالدارعا كەڭ جيىلىكتى تور جەلىسىن تۇتاستىرۋ مولشەرى %100 كە جەتكىزىلەدى.

　　ونەركاسىپ جانە ينفورماتسيالاندىرۋ مينيسترلىگىنىڭ قاتىستى جاۋاپتىسىنىڭ ايتۋىنشا، شەكارالىق وڭىرلەردەگى تور جەلىسى قۇرىلىسىنىڭ ماڭىزى زور. جىلجىمالى جانە تۇراقتى كەڭ جيىلىكتى تور جەلىسىمەن ىشكەرىلەي قامتۋ، تور جەلىسىمەن قامداۋ جانە قىزمەت وتەۋ قۋاتىن جاپپاي جوعارىلاتۋ شەكارا وڭىرلەردىڭ جوعارى ساپالى دامۋىنا قاجەتتى ينفورماتسيالىق ”كۇرە تامىردى“ تۇتاستىرۋعا ءتيىمدى.

　　ۇقتىرۋدا اۋدان قالاشىعىنداعى كەڭ جيىلىكتەگى تور جەلىسىنىڭ دارەجەسىن جوعارىلاتۋدى جەدەلدەتۋ، اۋىل - قىستاقتاعى كەڭ جيىلىكتەگى تور جەلىسى قۇرىلىسىن كۇشەيتۋ، جولداردى جىلجىمالى تور جەلىسىمەن قامتۋدى ىلگەرىلەتۋ، شەكارالىق باسقارۋ قۇرىلىمدارى مەن شەكارالىق ساۋدا وڭىرلەردە تور جەلىسىمەن قامتاماسىزداندىرۋ قۋاتىن كۇشەيتۋ، تەڭىزدەگى ارالدار مەن تەڭىز الابىن كەڭ جيىلىكتەگى تور جەلىسىمەن قامتۋدى كۇشەيتۋ، تور جەلىسىن قورعاۋ مەن قىزمەت وتەۋ ورەسىن جوعارىلاتۋ، شەكارالىق وڭىرلەردىڭ سيفرلى دامۋىنا دەم بەرۋ قاتارلى 7 ءتۇرلى جاقتاعى ماڭىزدى مىندەتتەر ايقىندالعان. مۇندا، نەگىزدىك تەلەكوم سالاسىنداعى كاسىپورىنداردىڭ شەكارالىق اۋدان ورتالىقتارىندا ”قوس گيگابايتتىق“ تور جەلىسىنىڭ نەگىزدىك قۇرىلعىلارىن ۇيلەسىمدى تۇردە الدىن الا ورنالاستىرۋىنا بەلسەندىلىكپەن جول كورسەتۋ، اۋىل - قىستاقتاعى جان سانى شوعىرلى ورنالاسقان وڭىرلەردە كەڭ جيىلىكتەگى تور جەلىسىنىڭ دارەجەسىن جوعارىلاتۋ، ورتا جيىلىكتەگى جانە تومەن جيىلىكتەگى 5G تور جەلىسى نەگىزدىك پۋنكتتەرىن يكەمدى پايدالانۋ، 5G تور جەلىسىنىڭ اۋىل - قىستاقتاعى وڭىرلەرگە قاراي كەڭەيۋىن، قامتۋىن بىرتىندەپ ىلگەرىلەتۋ ايرىقشا اتاپ وتىلگەن.

　　ۇقتىرۋعا ساي، قاتىستى تاراۋلار جەر - جەردى ارناۋلى ساياسات شىعارۋعا، شەكارالىق وڭىرلەردەگى تور جەلىسى نەگىزدىك قۇرىلعىلارىن قالا اكىمشىلىگى، الەۋمەتتىك قىزمەت وتەۋ نەگىزدىك قۇرىلعىلارى قاتارلىلاردى ورنالاستىرۋمەن، جوسپارلاۋمەن ۇشتاستىرىپ، قۇرىلىس كەڭىستىگىن الدىن الا قالدىرۋعا شابىتتاندىرادى.

　　كەلۋ قاينارى: حالىق تورابى

جاۋاپتى رەداكتورى : نۇرعيسا قۇرمانجان ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved