بۇقارانىڭ بانكەدەگى اقشاعا مۇراگەرلىك ەتۋىنە اناعۇرلىم قولايلىلىق جاراتادى
سوماسى 50 مىڭ يۋاننان تومەن بولسا كۋالاندىرۋدىڭ قاجەتى جوق
2024.04.28 16:49 كەلۋ قاينارى : حالىق تورابى
حالىق گازەتىنىڭ ءتىلشىسى چۇي شينميڭ، وۋياڭ جيە 4 – ايدىڭ 27 – كۇنى بەيجيڭنەن حابارلايدى. ءتىلشىنىڭ فينانستى باقىلاۋ – باسقارۋ باس مەكەمەسىنەن ۇعىسۋىنشا، بۇقارانىڭ بانكەدەگى اقشاعا مۇراگەرلىك ەتۋىنە قولايلىلىق جاراتۋ ءۇشىن، فينانستى باقىلاۋ – باسقارۋ باس مەكەمەسى قاتارلى ورىندار «ومىردەن وتكەن ادامنىڭ بانكەگە قويعان شاعىن سوماداعى اقشاسىن شىعارىپ الۋعا قويىلاتىن قاتىستى تالاپتاردى جاقسارتۋ جونىندەگى ۇقتىرۋدى» بەلگىلەگەن. 2021 – جىلى اسىلگى بانكە – قامسىزداندىرۋ ىستەرىن باقىلاۋ – باسقارۋ كوميتەتى قاتارلى ورىندار قاتىستى قۇجاتتاردى شىعارىپ، ءبىرىنشى رەتتەگى مۇراگەر، كۋالاندىرىلعان وسيەتتەگى بەلگىلەنگەن مۇراگەر جانە وسيەتتەگى مۇراعا يە بولۋشى ومىردەن وتكەن ادامنىڭ بانكەگە قويعان 10 مىڭ يۋاننان تومەن سوماداعى اقشاسىن شىعارىپ الماقشى بولسا، ونى كۋالاندىرۋ كۇشىنەن قالدىرىلادى دەپ بەلگىلەگەن. ۇقتىرۋدا وسىنىڭ نەگىزىندە، ومىردەن وتكەن ادامنىڭ بانكەگە قويعان شاعىن سوماداعى اقشاسىن شىعارىپ الۋدى قاراپايىمداستىرۋدا قاراجات سوماسىنا قويىلاتىن شەكتەمەنى ءبىرتۇتاس 50 مىڭ يۋانعا جوعارىلاتقان. بيىل 6 – ايدىڭ 1 – كۇنىنەن باستاپ اتقارىلادى.
وڭىرلەر مەن قۇرىلىمدار اراسىنداعى پارىقتى ويلاستىرا وتىرىپ، اۋىل – قىستاقتاعى ورتاشا، شاعىن تيپتەگى بانكەلەر 2025 – جىلدىڭ سوڭىنان بۇرىن اتالعان تالاپتى تياناقتاندىرۋى كەرەك. مۇنان سىرت، ساقتاعان التىن بۇيىمدار، سونداي – اق، مەملەكەت زايومى، قارجى قۇراۋ ونىمدەرى قاتارلىلاردى دا شىعارىپ الۋ رەسميەتىن قاراپايىمداستىرۋ كولەمىنە ەنگىزىپ، قاتىستى سوما تىركەلگىگە قويىلاتىن 50 مىڭ يۋاندىق شەكتەمەنىڭ ىشىندە ەسەپتەلەدى. شاعىن سوماداعى اقشانى شىعارىپ الۋ بارىسىندا ءوتىنىش بەرۋشىلەر تاپسىرعان ماتەريالداردىڭ تولىق بولماۋى نەمەسە تالاپقا ۇيلەسپەۋى قاتارلى ۇنەمى كەزدەسەتىن جاعدايلارعا باعىتتاي وتىرىپ، ۇقتىرۋدا ءوتىنىش بەرۋشىلەرگە بانكەلەر قاتىستى تالاپتاردى ءبىر رەتتە تولىق ايتۋىن تالاپ ەتكەن.
فينانستى باقىلاۋ – باسقارۋ باس مەكەمەسىنىڭ قاتىستى مەڭگەرمەسىنىڭ جاۋاپتىسىنىڭ ايتۋىنشا، رەال ومىردە مۇراگەر بەلگىلى جاعدايدا ومىردەن وتكەن ادامنىڭ كوزى ءتىرى كەزدە بانكەگە قويعان اقشاسىنىڭ كىرىس – شىعىس ەستەلىگىن تەكسەرۋ سىندى ۇيلەسىمدى تالاپ قويۋى مۇمكىن. ۇقتىرۋدا مىنالار ايقىندالعان: بانكە ءبىرىنشى رەتتەگى مۇراگەردىڭ تالابىنا ساي، ومىردەن وتكەن اقشا قويۋشىنىڭ قازا بولعاننان كەيىنگى جانە قازا بولۋدان بۇرىنعى 6 اي ىشىندەگى ەسەپ نومىرىندەگى كىرىس – شىعىس ەستەلىگىن بەرۋىنە بولادى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
